Grikkaland: Hava nú fingið tamarhald á eldunum

Endiliga hava bjargingarfólk fingið tamarhald á skógar- og náttúrueldunum, sum hava elvt til ringastu náttúrukreppuna í Grikkalandi í fleiri áratíggju.

Tað sigur talsfólk hjá griksku bjargingartænastuni, Spyros Georgiu.

Regnið og minkandi hitin hava hjálpt sløkkiliðsfólkunum við at fáa tamarhald á støðuni. Tilbúgvingin er tó framvegis til reiðar, um eldurin á oynni Evia og í Arcadia-landsltuinum skulu kykna uppaftur.

Um vikuskiftið væntast sterkur vindur, og tí verða manningarnar, sum eru sendar úr útlondum at hjálpa, verandi í Grikkalandi, skrivar Ritzau.

Eins og onnur Suðurevropeisk lond, hevur Grikkaland verið rakt av einari ógvusligari hitabylgju, sum hevur elvt til hita á upp til 45 stig í støðum.