Guvernørur: Spreingingar kravt trý mannalív í russiskum býi

Spreingingar í russiska býnum Belgorod hava í dag kravt í minsta lagi trý mannalív og oyðilagt 11 íbúðarbygningar og 39 sethús.

Vjatjeslav Gladkov, guvernørur í økinum sigur, at orsøkin til hendingina verður kannað.

Belgorod liggur nærindis markið til Ukraina, og Gladkov hevur áður lagt Ukraina undir at senda hernaðartyrlur inn yvir markið og leypa á goymslur við brennievni. Tað var 1. apríl, men sambært DR er hetta hvørki váttað av russisku ella ukrainsku stjórnini.

Russiski politikarin Andrej Klishas leggur Ukraina undir at hava lopið á Belgorod og sigur, at hetta eigur at fáa hernaðarligar avleiðingar.

Sambært tíðindastovuni Reuters hevur Ukraina ikki viðmerkt hendingina, og upplýsingarnir eru ikki váttaðar av óheftum keldum.