Hagstovan: Vøksturin í útgoldnum lønum 5,5 prosent

Í tíðarskeiðnum apríl 2024 til mars 2025 vórðu 12,9 milliardir krónur útgoldnar í lønum.

Tað er 680 milliónir meira enn undanfarnu 12 mánaðirnar - ein vøkstur á 5,5 prosent, skrivar Hagstovan.

Seinastu 12 mánaðirnar áttu kvinnur 39 prosent av samlaðu lønunum, sum er eitt prosent hægri enn í undanfarnu 12 mánaðirnar.

Av samlaða vøkstrinum á 680 milliónir krónur, áttu kvinnurnar 54 prosent við 368 milliónum krónum.

Samlaða útgoldna lønin hjá kvinnum var næstan átta prosent hægri seinastu 12 mánaðirnar samanborið við undanfarnu 12 mánaðirnar. Hjá monnum var lønin fýra prosent hægri.

Í mars var mánaðarliga miðallønin fyri hvønn persón 35.380 krónur - átta prosent hægri samanborið við sama mánað í fjør.

Í mars fingu kvinnur 28.567 krónur í miðal, sum er 31 prosent lægri enn miðallønin hjá monnum, sum var 41.582 krónur. Samanborið við sama mánað árið fyri er útgoldna miðallønin næstan tíggju prosent hægri hjá monnum og seks prosent hjá kvinnum, skrivar Hagstovan.