Handverksmeistarafelagið kærir niðurstøðu hjá Kappingareftirlitinum

Kappingareftirlitið almannakunngjørdi í gjár avgerð um, at Føroya Handverksmeistarafelag og nakrir limir felagssins skulu hava framt brot á grein 6 í kappingarlógini.

Málið snýr seg um, at Føroya Handverksmeistarafelag í 2020 mælti undangóðkendum fyritøkum frá at bjóða uppá arbeiðið at gera eina svimjihøll í Runavík, tí útbjóðingartilfarið ikki var í lagi.

Nevndin í Føroya Handverksmeistarafelag hevur viðgjørt niðurstøðuna hjá Kappingareftirlitinum, og hevur avgjørt at kæra, sigur Føroya Handverksmeistarafelagið í tíðindaskrivi.

Nevndin er ósamd í niðurstøðuni og metir, at fortreytirnar hjá Kappingarráðnum at gera niðurstøðuna eru skeivar.

Føroya Handverksmeistarafelag ætlar ikki at gera fleiri viðmerkingar til málið, fyrr enn ein endalig niðurstøða fyriliggur í málinum.