Hanus í kommunalari tænastu í yvir 40 ár

Hann er slektaður úr Hoygarðinum á Toftum og er glyvramaður - mamman úr Kálvhúsinum. Hanus Heinesen er útbúgvin navigatørur, er giftur og býr á Skála. Í nógv ár var hann havnaumsjónarmaður við Skála havn, og síðani kommunurnar gingu saman í eina, hevur hann verið partur av Vegadeildini hjá Runavíkar kommunu.

Soleiðis skrivar Runavíkar kommuna um mannin, ið fyri heilt stuttum fylti 70 ár og sum byrjaði í starvi hjá Skála kommunu fyri yvir 40 árum síðani.

Í hesum sambandi var hátíðarhaldi á Lambareiði týsmorgunin, har borgarstjórin flutti fram røðu fyri Hanusi. Tórbjørn Jacobsen handaði honum blómur og ein málning, málaður av Sámali Toftanes, sum gávu. Motivið var av Toftum.