Helt seg síggja grind út fyri Leirvík

Klokkan 16.15 í dag fekk løgreglan boð frá onkrum, sum helt seg síggja grind út fyri Leirvík.

Men grindaboðini vorðu tó avblást stutt aftaná, tí at tað vísti seg, at talan ikki var um grind men um nísur, sigur løgreglan.

Sambært in.fo, vóru grindaformennirnir annars í dýrastu neyð, tí teir ikki vistu, hvar grindin skuldi haldast til.

Ætlanin var fyrst at reka hana á Fuglafjørð, men sambært grindaformanni har, var einki fólk at taka ímóti henni. Tí varð hugsað at reka hana á Funningsfjørð ella til Klaksvíkar. Men eftirsum at talan ikki var um grindahval kortini, bleiv hetta av ongum.