Hervilig ódn ávegis til Louisiana

Ein ódn, sum væntast at raka amerikanska statin Louisiana í dag, kann vera tann ógvusligasta, sum hevur rakt statin, síðan 1850ini. Tað sigur John Bel Edwards, guvernørur í Louisiana.

Ódnin Ida er ein sonevnd "kategori 4-ódn", og væntast hon at elva til vatnflóð í stórum partum av statinum.

Sunnari parturin av statinum stríðist enn við fylgjunum av ódnini Laura, sum rakti statin fyri einum ári síðani. Samstundis eru sjúkrahúsini í statinum eisini undir stórum trýsti orsakað av mongu koronutilburðunum. Seinastu vikuna hevur Louisiana havt triðstørsta talið á smittutilburðum per 100.000 íbúgvar í USA. Í løtuni eru 2.700 koronasjúklingar innlagdir í statinum, skrivar Ritzau.

Fyri júst 16 árum síðani elvdi ódnin Katrina eisini til umfatandi oðileggingar í Louisiana. Tá lótu 1.800 fólk lív.

Fleiri fólk eru longu flutt burtur, men sambært guvernørinum í Louisiana, er tað ikki ætlanin at flyta fólk úr sjúkrahúsunum, áðrenn ódnin kemur.

Hann sigur, at hesar umstøðurnar við nógvum koronusjúklingum og einari stórari ódn áveg eru óvanligar, og hava myndugleikarnir verið í sambandi við sjúkrahúsini fyri at tryggja sær, at genenatorarnir hjá teimum rigga, og at tey eiga meira inni av vatni enn vanligt.

Joseph Kanter, ovasti leiðarin hjá heilsumyndugleikunum í Louisiana, sigur, at talan er um eina kraftmikla og vandamikla ódn, sum hevur flutt seg skjótari, enn tey høvdu roknað við, og hava tey tí ikki havt nógva tíð at fyrireika seg.