Hitabylgja herjar í Grikkalandi

Ein ógvuslig hitabylgja herjar í stórum pørtum av Grikklandi. Aftur í dag verður roknað við yvir 40 hitastigum nógva staðni í landinum.

Tað hevur ongantíð fyrr so heitt so tíðliga á árinum í Grikkalandi, skriva tíðindastovurnar.

Orsøkin til hitabylgjuna, siga serfrøðingar, er broytingin í veðurlagnum.

Myndugleikarnir sóu seg noyddar til at steingja vælumtókta ferðafólkastaðið, Akropolis í Athen, stóran part av degnum í gjár.

Eisini skúlar hava stongt, og heitt verður á grikkar um at arbeiða heimanífrá. Tey, sum hava uttandura arbeiði hava fingið boð um at halda ein støðg millum klokkan 12 og 17.

(Mynd: EPA)

Reyði Krossur er til staðar á fleiri støðum, har ferðafólk fylkjast, fyri at geva fólki vatn. Rættiliga nógv fólk eru innløgd við hitaslagi.

Í skógum og lundum eru sløkkilið og løgreglan á serligum varðhaldi, tí vandin fyri náttúru- og skógareldum er øktur í nógva hitanum.

Seinni í vikuni verður roknað við meira vindi í økinum, og hetta økir um vandan fyri náttúrueldum. Seinastu árini eru nógv støð í Suðurevropa rakt av umfatandi og oyðileggjandi skógareldum.

Grikkaland er millum tey lond, sum eru harðast rakt av veðurlagsbroytingunum, skrivar finska kringvarpið Yle við AFP, Reuters, AP og EBU sum keldum.