Hitabylgjan í Evropa kravt fleiri mannalív

Ógvusligi hitin breiðir seg yvir Evropa í hesum døgum, og í Fraklandi, Spania, Italia og pørtum av miðevropa, eru fleiri nýggj hitamet sett.

Hitin hevur eisini elvt til fleiri deyðsføll, og lokalu myndugleikarnir heita á fólk um at ansa sær, skrivar Politiken.

Í gjár, fríggjadagin varð nýtt hitamet sett í Gallargues-le-Montueux í Suðurfraklandi. Har kom hitin nevniliga upp á heili 45,9 stig.

Ógvusligi hitin elvdi til, at ein 93 ára gamal maður í Norðurspania doyði av slag, og ein tannáringur í Andalusia doyði eisini á sjúkrahúsinum, eftir hann varð vorðin ússaligur og síðani svímaður í einum svimjihyli.

Franski heilsumálaráðharrin, Agnes Buzyn heitir á borgarar um bert at svimja á almennum støðum. Bert hesa vikuna eru fýra fólk druknað.

Og hitin hevur eisini elvt til deyðsføll í Italia, Fraklandi og Týsklandi, og tað er serliga eldri borgarar, ið eru raktir.

Við nýggja hitametinum verður Frakland sætta landið í Evropa, ið nakrantíð hevur upplivað hita yvir 45 stig.

Hini londini eru Bulgaria, Portugal, Spania, Grikkaland, og Norðurmakedonia.

Sambært veðurstovninum hjá ST, WMO, eru vit ávegis móti einum globalum hitameti.