Alda Nielsdóttir
Hesin september mánaðurin, sum júst er farin aftur um bak, var tann heitasti september mánaðurin, sum nakrantíð er skrásettur, upplýsir Copernicus Climate Change Service hjá ES í dag.
September var triði mánaðurin í ár, sum setti eitt altjóða hitamet. Hini metini vórðu sett í januar og mai.
September 2020 var 0,05 stig heitari enn september 2019 og 0,08 stig heitari enn í sama tíðarskeiði í 2016.
Tað var serliga í Sibiria og Arktis, at hitin var munandi hægri enn vanligt. Men lond sum Turkaland, Ísrael og Jordan settu eisini hitamet í september, skrivar Ritzau.
Hesi hitametini vórðu sett, hóast veðurfyribrigdið La Niña hevði eina niðurkølandi ávirkan í stórum pørtum av tropiska kyrrahavsøkinum. Hetta ger, sambært serfrøðingum, hitametið meira undranarvert.
19 av seinastu 20 árunum eru skrásett millum heitastu árini, sum nakrantíð eru skrásett.
Vinarliga broyt tínar kennifíla - og privatlívsstillingar fyri at síggja hetta innihald