Hóast stórsigur: Eurovision verður ikki í Ukraina næsta ár

Vanligt er, at vinnarlandið í Eurovison skipar fyri stóru kappingini árið eftir. Soleiðis verður ikki í ár.

Ukrainska Kalush Orchestra vann í stórum stíli kappingina við 631 stigum, men nú boðar felagsskapurin hjá Eurovision, EBU, frá, at kappingin næsta ár ikki verður hildin í Ukraina. Orsøkin er russiska innrásin.

EBU fer nú í holt við at samráðast við bretska BBC um møguliga at skipa fyri Euruovison í 2023 ístaðin fyri Ukraina. Tað verður gjørt, tí Stórabretland endaði á øðrum plássi í Eurovision-finaluni.

Ukraina hevur áður skipað fyri Eurovision. Tað var í 2005 og í 2017.