Húsini illa farin

Eldurin sum seint seinnapartin kyknaði í einum sethúsum á Marknoyri í Vági, varð fyrr í kvøld sløktur.

Suðurrás veit, at fólk komu á staðið beinanvegin, og maðurin sum var inni í húsinum, varð fingin út.

Sløkkiliðið í Vági og sløkkiliðsbilur av Tvøroyri komu á staðið, og eldurin varð sløktur.

Gudmund Jacobsen, átaksleiðari í Vágs kommunu, sigur við Suðuroyarportalin, at húsini eru illa farin.

- Uttari partur er illa brendur, meðan stórur roykskaði er í vestara parti av húsunum, sigur hann.

Ikki er greitt hví eldurin kyknaði. Orsøkin skal nú kannast.