Sverri Egholm
Í Degi og viku í gjárkvøldið ljóðaði at tey í ungmannafelagnum hjá Fólkaflokkinum, Huxa, vóru sera ónøgd við støðuna og umhugsaðu at leggja frá sær sum nevnd.
Men nú 25 ára gamli Beinir Johannesen er valdur sum nýggjur formaður í Fólkaflokkinum, fegnast tey í Huxa.
- Vit gleðast um at eitt umboð hjá okkum hevur klárað seg so væl, og vit fara at stuðla honum fult og heilt, segði Eyðstein Zachariasen, skrivari í Huxa, eftir at avgerðin í gjárkvøldið varð fallin á Beinir Johannesen sum nýggjan formann.
Í Huxa eru ymiskar meiningar um etisk mál, men tey fegnast nú um, at tingfólk kunnu atkvøða eftir egnari sannføring í etiskum málum.
- Vit høvdu nakrar niðurstøður, sum vit vildu koma fram til á fundinum, og tær niðurstøðurnar eru vit komin fram til, sigur Eyðstein Zachariasen.
- Tað er eingin ivi um at tað eru ymiskar meiningar um etisk mál, eisini í Huxa. Men man (Huxa nevndin, red.) var samdur um, at vit skuldu koma til hetta, og tað var floksleiðslan eisini samd um.
Beinir Johannesen stillaði upp fyrstu ferð til fólkatingsvalið í 2019 og fekk 677 atkvøður. Á løgtingsvalinum í 2019 kom hann sendandi inn á ting sum fyrstvaldur á Fólkaflokslistanum við 998 atkvøðum.
Til fólkatingsvalið 31. oktober í ár fekk Beinir Johannesen 605 atkvøður.
Les eisini: - Hava lagt gamlar ósemjur aftur um okkum og líta fram eftir
Vinarliga broyt tínar kennifíla - og privatlívsstillingar fyri at síggja hetta innihald