Í dag hittast Putin og Lukasjenko

Í dag hittast russiski forsetin, Vladimir Putin, og hvítarussiski forsetin, Aleksandr Lukasjenko. Fundurin verður í russiska býnum Sotji.

Seinastu fimm vikuskiftini hava stórar mótmælisgongur verið í hvítarussiska høvuðsstaðnum Minsk, og er tað millum annað støðan í Hvítarusslandi, sum verður umrøtt í dag.

Á skránni er eisini orku- og handilssamstarv.

Hvítarussiska innlendismálaráðið upplýsir, sambært Ritzau, at 774 mótmælisfólk vórðu handtikin sunnudagin, harav 500 í Minsk, har uml. 100.000 mótmældu.

Mótmælisfólkini hava kravt, at Lukasjenko, sum hevur sitið við valdið síðan 1994, leggur frá sær, og viðurkenna tey ikki úrslitið av forsetavalinum í august, har Lukasjenko skuldi havt fingið 80 prosent av atkvøðunum. Sagt verður, at talan er um valsvik.

Eisini krevja mótmælisfólkini, at andstøðupolitikarin, Maria Kolesnikova, verður leyslatin. Hon varð handtikin í vikuni, tá hon noktaði at fara úr landinum og skræddi passið hjá sær sundur.