Illgruni var helst um eld fyrr um kvøldið

Sløkkiliðið var í City Church í Havn um 22 tíðina týskvøldið, tí tey har á staðnum høvdu ringt. Tað váttar vaktleiðarin á løgreglustøðini.

Illgruni hevur helst verið um okkurt, tá tey hava tilkallað sløkkiliðsleiðaran, sigur vaktleiðarin á løgreglustøðini, sum kortini ikki vil siga meira, til kanningararbeiðið er liðugt.

(Mynd: Sverri Egholm)

Eldurin var annars fráboðaður góðar tveir tímar seinni, klokkan 00:18. Tá var opin eldur og City Church fekk stóran skaða. Serliga stóri salurin og nógva útgerðin hevur fingið skaða.

Tað var helst í fýrrúminum at eldurin kyknaði.

Av løgreglustøðini verður sagt, at ætlanin er at kanna eldin í dag. Ein annar eldur, sum eisini skal kannast, er eldsbrunin á Slættabergi fyri viku síðan. Ymsar orsøkir hava ført til, at tað ikki verður kannað fyrr enn nú.