India og Pakistan rakt av hitabylgju

India og Pakistan eru í løtuni rakt av ógvusligari hitabylgju, sum hevur elvt til bæði vatntrot og streymslit nógvastaðni.

Hitin í indiska høvuðsstaðnum New Delhi varð í dag máldur til 45 stig, og sambært veðurfrøðingum er líkt til, at tað verður uppaftur verri um vikuskiftið.

Verri var í Sindh-landslutinum í Pakistan, har hitin mikudagin varð máldur til 48 stig.

Sambært Ritzau er tað ikki vanligt, at veðrið í økinum er so heitt um hesa tíðina á árinum, og er tað helst veðurlagsbroytingar, sum eru orsøkin.

Í nógva hitanum kom eldur í eitt ruskpláss í New Delhi, og í indisku statunum Rajastahan, Gujarat og Andhra Pradesh er streymurin avbrotin á fleiri verksmiðjum, eftir at streymnýtslan til aircondition er farin upp.

Miðlar hava eisini boðað frá koltroti, og kol er ein av mest týðandi keldunum til streymframleiðslu í India, sum hevur 1,4 milliard íbúgvar.

Vatntrotið, sum serliga rakar bøndur hart, fer at vara, til monsunin kemur aftur í juni og juli. Bøndur hava tí í løtuni trupult við at nøkta eftirspurninginum av hveiti, so at India kann útflyta størri nøgdir av hesum, meðan Ukraina, sum annars er stórur veitari av hveiti, er rakt av kríggi.