Iran: Enn ein persónur avrættaður í sambandi við mótmæli

Fyri aðru ferð innan eina viku er ein persónur avrættaður í Iran fyri at hava tikið lut í mótmælunum móti prestastýrinum, sum hava sett sín dám á landið seinastu mánaðirnar.

Tað upplýsir iranska tíðindastovan Mizan sambært DR.

Talan er um ein mann, sum varð hongdur alment í býnum Mashhad í morgun.

Hann fekk ein deyðadóm fyri at fara "í kríggj móti Gudi", eftir at hann stakk tvey trygdarfólk til deyðis.

Hósdagin varð ein annar maður hongdur fyri leiklut sín í mótmælunum. Maðurin var dømdur fyri at hava blokerað ein veg í høvuðsstaðnum Teheran og fyri at hava stungið ein trygdarvørð í økslina.

Síðan miðskeiðis í september hava stór mótmæli verið í landinum, eftir at 22 ára gamla kvinnan, Mahsa Amini doyði eftir at hon varð handtikin, tí hennara hijab (turriklæði) sambært myndugleikunum ikki fjaldi hár hennara nóg væl.