Iran: Hava víst 22.000 mótmælisfólkum náði

Iranska tíðindastovan IRNA boðar í dag frá, at 22.000 persónar, sum vórðu handtiknir undir mótmælinum móti iranska prestastýrinum, sum byrjaðu í heyst, eru náðaðir

Tað upplýsir ovasti dómarin í landinum sambært tíðindastovunum Reuters og AP.

Fyrst í februar boðaðu iranskir miðlar eisini frá, at Ayatollah Ali Khamenei hevði náðað tíggjutúsundatals fangum. Higartil er talan um 82.000, harav 22.000, sum vórðu handtiknir fyri at luttaka í mótmælunum. Hetta er tó ikki váttað frá øðrum keldum.

Nær allir hesir persónarnir vórðu handtiknir, ella hvat teir vóru skuldsettir fyri, er ikki upplýst, men sagt verður, at talan er um persónar, sum ikki eru skuldsettir fyri tjóvarí ella harðlig brotsverk.