Iranar lova samsýning til tann, ið drepur Trump

Ein iranskur politikari hevur boðað frá, at tríggjar milliónir dollarar verða latnir til ”tann, sum drepur Trump”. Hetta hevur hálvalmenna iranska tíðindastovan, Isna, boðað frá.

- Vegna fólkið í Kerman landslutinum vilja vit rinda 3 milliónir dollarar í reiðupeningi í virðisløn til tann, sum drepur Trump, sigur Ahmad Hamzeh í dag, sambært Isna-tíðindastovuni.

Jerusalem Post skrivar, at Ahmad Hamzeh ikki kom nærri inn á hvør tað er, sum hevur tikið avgerð um at koma við hesi hóttan móti amerikanska forsetanum.

Kerman er heimbýurin hjá Qassem Soleimani, iranska herleiðaranum, sum varð dripin í einum amerikanskum loftálopi í Irak 3. januar.