Ingi Samuelsen
Ísraelsk herfólk á landi hava í nátt framt eitt tað størsta álopið á Gazageiran síðan ófriðurin byrjaði 7. oktober.
Tað upplýsir útvarpsstøðin hjá ísraelska herinum, boða fleiri miðlar frá, eitt nú Reuters og Sky News.
Sambært herinum var talan um eitt “lutfalsliga umfatandi álop” á Hamas-mál í Gaza, og verður lýst sum tað størsta, ið herurin hevur framt síðan Hamas-álopini á Ísrael 7. oktober.
- Sum partur av fyrireikingunum til næsta stig í krígnum, hevur IDF (Israel Defence Force) framt hermálsliga atgerð í norðara parti av Gaza. Stríðsvagnar og gonguherfólk komu fram á fleiri yvirgangsklivar, undirstøðukervi og støður, sum skjóta rakettir móti stríðsvagnum. Herfólkini eru nú aftur á ísraelskum øki, skrivar ísraelski herurin, IDF, á X.
Í gjár segði ísraelski forsætisráðharrin, Benjamin Netanyahu, at Ísrael fyrireikar eina innrás í Gaza. Tó er ikki nøkur áseting sett fyri nær tað hendir.
Vinarliga broyt tínar kennifíla - og privatlívsstillingar fyri at síggja hetta innihald