Jákup Martin á Válinum tekur við sum stjóri í Fjarhitafelagnum

Í februar boðaði Fjarhitafelagið frá, at Hans Christian Dam fór frá við eftirløn. Hann hevði tá havt dagligu leiðsluna í felagnum í 22 ár.

Eirikur Mørkøre, fíggjarleiðari, varð tá settur sum fyribilsstjóri fyri restina av 2026.

Hans Christian Dam, Annita á Fríðriksmørk, forkvinna í Fjarhitafelagnum, og Eirikur Mørkøre (Mynd: Fjarhitafelagið)

Nú hevur nevndin sett ein nýggjan stjóra.

Talan er um Jákup Martin á Válinum. Hann er 44 ára gamal og býr í Vestmanna saman við konu síni og trimum børnum.

Jákup Martin tók útbúgving sum maskinmeistari í 2009, hann hevur seinastu tíðina siglt sum maskinmeistari við jack-up skipi innan vindmyllu uppseting. 

Fjarhitafelagið skrivar eisini um nýggja stjóran, at hann hevur royndir sum maskinmeistari á grønu orkuverkunum hjá SEV  og eisini leiðsluroyndir hiðani: Sum økisleiðari í miðstaðarøkinum og seinast sum deildarleiðari á rakstrardeildini hjá SEV.

- Nevndin vil takka Eiriki Mørkøre, ið hevur røkt starvið sum fyribilsstjóri síðani í vár,eftir at Hans Christian Dam legði frá sær sum stjóri vegna aldur. Somuleiðis vil nevndin takka Hans Christiani fyri síni 22 ár sum stjóri í felagnum.

Seks fólk arbeiða á Fjarhitafelagnum, sum fyri kortum flutti í nýggj høli Úti við Strond í Havn.