Semja er um, at bygdirnar í Tórshavnar kommunu skulu raðfestast hægri, og at kommunan áhaldandi arbeiðir við at fríðka um og gera ábøtur í allari kommununi, og hóskvøldið skal Tórshavnar býráð taka støðu til at játta tvær milliónit til fríðkan í bygdunum.
Ætlanin er, at allar bygdirnar í kommununi skulu verða fríðkaðar á ein ella annan hátt á hvørjum ári. Ynskiligt er tí, at hesar tvær milliónirnar verða settar av til fríðkan úti í bygdunum, og at allar bygdirnar fáa ein part av hesi upphædd, skrivar kommunan á heimasíðuna.
Átøkini verða viðgjørd í staðbundnu nevndunum, áðrenn avgerð verður tikin um, hvørji átøk skulu gerast í teimum ymisku bygdunum.
Hóskvøldið tekur býráðið, sum áður nevnt, støðu til eitt tilmæli um nevndu játtan. Bæði byggi- og býarskipanarnevndin og fíggjarnevndin hava samtykt tilmælið. Verður tilmælið játtað, verður tað sent til staðbundnu nevndirnar til umrøðu.
Vinarliga broyt tínar kennifíla - og privatlívsstillingar fyri at síggja hetta innihald