Joakim prinsur fær ikki varandi mein

Joakim prinsur fær eingi varandi mein av blóðtøppinum í heilanum, sum hann varð skurðviðgjørdur fyri um vikuskiftið.

Prinsurin, sum var í feriu í Fraklandi saman við familjuni varð innlagdur á universitetssjúkrahúsinum í Toulouse fríggjadagin, og somu nátt varð hann skurðviðgjørdur.

Joakim prinsur hevur nú verið innlagdur á intensivdeildini í nakrar dagar, og meta læknarnir, at hann ikki fær varandi mein orsakað av blóðtøppinum.

– Joakim prinsur fer væntandi skjótt at verða fluttur av intensivdeildini, men hann fer framhaldandi at vera innlagdur komandi tíðina, sigur kongshúsið í tíðindaskrivi.

51 ára gamli Joakim prinsur býr í løtuni í Fraklandi við familju sínari. Hann er í løtuni undir útbúgving á franska hernaðarakademinum Ecolé Militaire.