Johnson ger verjuavtalu við Svøríki og Finnland

Bretski forsætisráðharrin, Boris Johnson, hevur í dag gjørt eina trygdaravtalu við Svøríki.

Hetta hendi undir eini vitjan í Svøríki, har Boris Johnson vitjaði svensku forsætisráðkvinnuna, Magdalena Andersson.

Johnson fer at gera eina líknandi avtalu í Finnlandi, haðar hann fer seinni í dag, skrivar dr.dk.

Í avtaluni lovar Stórabretland at stuðla vápnaðu verjuni hjá teimum báðum londunum, um tey skuldu verið álopin.

Roknað verður við, at Svøríki og Finnland longu í hesi vikuni fara at søkja um limaskap í Nato-verjusamgonguni.

Londini hava tí ynskt serliga trygd í tíðini frá tí at tey senda umsókn til verjusamgonguna, og til tey gerast limir, skrivar Ritzau.

- Eingin skal vera í iva um okkara fulla stuðul til bæði Svøríki og Finnland, segði Johnson undir vitjanini.