Kalifornia: Drápsmaðurin hevur tikið sítt egna lív

Maðurin, sum var undir illgruna fyri at hava skotið tíggju fólk til deyðis og sært tíggju onnur í býnum Monterey Park í amerikanska statinum Kalifornia leygarkvøldið, er deyður, upplýsir løgreglan í Los Angeles.

Maðurin var rýmdur av staðnum eftir hendingina, og leitaði løgreglan eftir honum í gjár. Leitingin førdi løgregluna til ein vørubil, og tá løgreglufólk nærkaðust bilinum, hoyrdu tey eitt skot frá bilinum.

Persónurin skeyt segsjálvan, og varð hann staðfestur deyður á staðnum, sigur løgreglan, sum leggur afturat, at talan er um ein 72 ára gamlan mann við asiatiskum uppruna.

Sambært Ritzau eru fleiri fólk ikki undir illgruna í málinum, og er motivið handan skjótingina framvegis ókent.

Tíggju fólk vórðu dripin – fimm menn og fimm kvinnur, og flestu teirra vóru millum 50 og 60 ár.

Í Monterey Park búgva 60.000 fólk, og meginparturin av teimum hava asiatiskan uppruna. Leygarkvøldið savnaðust túsundatals fólk fyri at hátíðarhalda kinesiska nýggjárið.

Amerikanski forsetin, Joe Biden hevur boðað frá, at flaggast skal á hálvari stong fram til hósdagin fyri at minnast ofrunum.