Kamikaze-dronur hava bumbað Kyiv-økið í morgun

Eitt øki í Kyiv-landslutinum í Ukraina varð í morgun bumbað, helst við dronum. Tað upplýsir guvernørurin í økinum á boðtænastuni Telegram.

Oleksij Kuleba skrivar, at álopini vórðu framd av dronum, ið eru framleiddar í Iran. Hesar verða kallaðar sjálvmorðsdronur ella kamikazedronur, skrivar Reuters.

Seinastu vikurnar hevur Ukraina boðað frá eini bylgju av russiskum álopum við hesum iransku Shahed-136-dronunum. Iran sjálvt sýtir fyri at hava latið russum dronurnar.

Kyrylo Tymosjenko, varaovasti á forsetaskrivstovuni hjá Volodymyr Zelensky skrivar, eisini á Telegram, at “týðandi infrakervi” varð rakt í álopinum í morgun.

Eisini havnabýurin Mykolajiv varð raktur av russiskum rakettum í nátt, upplýsir eitt embætisfólk.

- Ein íbúðarbygningur í fimm hæddum varð raktur. Tvær tær ovastu hæddirnar eru oyðilagdar, upplýsir borgarstjórin í býnum á sosialu miðlunum.

Mánadagin og týsdagin varð bumbað eftir málum í sjálvum høvuðsstaðnum, Kyiv. Tey álopini kostaðu minst 19 mannalív, skrivar Reuters.

ST fordømir russisku innrásina

ST-aðalfundurin atkvøddi í gjárkvøldið annars fyri at fordøma russisku innlimanini av fýra landslutum í Ukraina. Heitt verður á Russland um beinanvegin at gevast við sínum álopum á grannalandið.

143 lond atkvøddu fyri fordømingini. Bert fimm lond atkvøddu ímóti. Umframt Russland eru tey Sýria, Hvítarussland, Norðurkorea og Nikaragua. Kina, India og 33 onnur lond atkvøddu ikki.