Kanna innbrot í Miðvági og í Klaksvík

Løgreglan kannar í løtuni tvey innbrot – eitt í Miðvági og eitt í Klaksvík.

Vaktleiðarin á politistøðini sigur, at eitt innbrot í FK í Miðvági og eitt í Atlantis Bio í Klaksvík varð meldað í gjár.

Innbrotið í Klaksvík hendi fríggjanáttina. Onkur hevði brotið ein stóran rút og verið inni og stolið úr kioskini.

Innbrotið í Miðvági er farið fram um høgtíðina, men tað varð fyrst uppdagað í gjár, tá starvsfólk komu aftur til arbeiðis. Her var talan um onkran, sum hevði tømt kassan fyri vekslipengar.

Løgreglan er enn í ferð við at kanna innbrotini, og í løtuni hava tey onga ábendingar um, hvør hevur brotið inn, sigur vaktleiðarin á politistøðini.