Kanna nøgdsemið og trivnaðin á eldraøkinum í Tórshavnar kommunu

Tórshavnar kommuna fer nú at gera nøgdsemis- og trivnaðarkanningar á eldraøkinum. Kanningarnar, sum fevna um brúkarar, avvarðandi og starvsfólk, eru liður í arbeiðinum at framtíðartryggja eldraøkið, skrivar Tórshavnar kommuna.

Kommunan vil hava at vita, hvussu nøgd fólk eru við tænasturnar á eldraøkinum, og hvussu starvsfólkini trívast, og tí skrivaði kommunan hósdagin undir sáttmála við fyritøkuna Lóður um at gera hesar nøgdsemis- og trivnaðarkanningar á eldraøkinum.

Tí hevur kommunan í dag undirskrivað sáttmála við fyritøkuna Lóður, um at gera nøgdsemis- og trivnaðarkanningar á eldraøkinum.

Kanningarnar eru ein týðandi liður í arbeiðinum at framtíðartryggja eldraøkið í kommununi, og hevur Tórshavnar býráð sett sær fyri at loysa avbjóðingarnar á eldraøkinum, m.a. vaksandi tørvurin á starvsfólki og tænastum, skrivar kommunan á heimasíðuna.

Ein arbeiðsbólkur er settur at lýsa og greina avbjóðingarnar í eldraøkinum, og hesin skal síðani saman við starvsfólkum gera tilmæli um, hvussu eldrarøkið kann virka frameftir. Eldraráðið í Tórshavnar kommunu er eisini við í tilgongdini.

Brøvini til luttakararnar verða send út nú, og nøgdsemis- og trivnaðarkanningarnar verða gjørdar tær komandi vikurnar. Sambært Tórshavnar kommunu eru allar kanningarnar skipaðar soleiðis, at tær eru dulnevndar. Hetta merkir, at kommunan fær ikki innlit í, hvat hvør hevur svarað.