Kanningardeildin hjá løgregluni hevur úr at gera við álvarsomum málum

- Her er ikki nakað nevnivert at fortelja um frá seinasta samdøgrinum.

Vakthavandi á løgreglustøðini kundi staðfesta hetta í morgun til dagliga telefon-fundin við miðlarnar: Friðarligt samdøgur hjá løgregluni - sum so.

Tí hann kundi eisini staðfesta, at hóast tað ikki var nakað spennandi at siga um náttina, og eingin verulig mál vóru týsdagin, so er nóg mikið at hyggja uppá hjá løgregluni.

Serliga hevur kanningardeildin úr at gera. Talan er um fleiri tung og álvarsom mál, ið eru á borðinum í løtuni. Kanningararbeiði er i gongd - umfatandi mál í fleiri førum - og revsimál eru mest sannlíkt ávegis.

Talan er tó ikki um mál, ið løgreglan kann fara í smálutir við og sum heild fortelja meira um í løtuni.