Karl Lagerfeld doyði í morgun

Týski mótasniðgevin, Karl Lagerfeld, er deyður, 85 ára gamal. Tað boðar mótahúsið Chanel frá, sambært AP tíðindastovuni.

Lagerfeld var serliga kendur fyri síða tíð hjá Chanel, har hann var høuðssniðgevi í trý áratíggjur fram til deyða sín. Hann varð settur í starv í 1983 fyri bøta um umdømið hjá kenda mótahúsinum.

Karl Lagerfeld gjørdist gitin í 1954 tá hann teknaði ein ulljakka, sum vann eina kapping og tryggjaði honum praktikkpláss hjá heimskenda sniðgevanum, Pierre Balmain.

Lagerfe var kendur fyri altíð at vera í myrkum klædningi, við longum hári knýtt í hesthala og við myrkum sólbrillum.

- Á onkran hátt, eri eg ein karikaturur av mær sjálvum, og tað dámar mær væl, er eitt av kendu sitatunum hjá Lagerfeld.

Sambært blaðnum Purepeople, doyði Karl Lagerfeld í morgun eftir í skundi at verða fluttur til sjúkrahúsið í Neuilly-Sur-Seine nærhendis Paris í gjárkvøldið.

Tað er eitt sindur óvist nær hann varð føddur, men hildið verður, at føðingardagurin var 10. september 1933, skrivar Reuters. Mamman var týskari, pápin svii.