Keldur: Finnland og Svøríki fara at søkja um Nato-limaskap í summar

Finnland og Svøríki fara væntandi at søkja um limaskap í verjusamgonguni Nato í summar. Tað upplýsa keldur úr amerikonsku stjórnini til bretska blaðið The Times, sambært tíðindastovuni Reuters.

Møguligi limaskapurin varð umrøddur á fundi millum uttanríkismálaráðharrar í teimum 30 Nato-londunum í farnu viku, og tá vóru uttanríkismálaráðharrar úr Finnlandi og Svøríki eisini bjóðaðir við.

Væntandi fer Finnland at søkja um limaskap í juni, og Svøríki fer væntandi at gera tað sama seinni.

Meirilutin fyri Nato-limaskapi

Tað er russiska innrásin í Ukraina, sum er beinleiðis orsøk til, at tey bæði londini ynskja at gerast partur av Nato. Annars hava borgarar úr báðum londum verið ímóti hesum í fleiri áratíggju.

Meiningakanningar í Finnlandi vísa m.a., at nærum 60 prosent av fólkinum nú tekur undir við, at landið gerst limur í Nato. Tað er tvífalt so nógv sum áðrenn kríggið í Ukraina.

Finski forsætisráðharrin, Sanna Marin segði fríggjadagin, sambært Ritzau, at ein avgerð verður tikin ein av komandi mánaðunum.

– Fer ikki at bøta um støðuna í Evropa

Um Finnland og Svøríki fara uppí Nato fer tað tó ikki at bøta um støðuna í Evropa – um tú spyrt Dmitrij Peskov, talsfólk hjá russisku stjórnini.

Sambært honum er Nato ein felagsskapur, sum leitar eftir uppgerð.

– Vit hava fleiri ferðir sagt, at Nato-samgongan fer at verða eitt amboð rættað móti konfrontatión, og ein víðkan av henni fer ikki at gera støðuna betri á evropeiska meginlandinum, sigur hann.