Kenna ikki orsøkina til ferðsluóhapp í Tórsgøtu

Løgreglan kennir enn ikki orsøkina til ferðsluóhappið í Tórsgøtu í Havn í gjár, har ein bilur rendi á ein mann og fleiri aðrar bilar, men málið verður kannað nærri, sigur vaktleiðarin á løgreglustøðini í Havn.

Tað var um middagsleitið í gjár, at ein bilførari onkursvegna misti tamarhaldið á bilinum og endaði við at koyra á ein mann, sum gekk á gongubreytini, umframt aðrar bilar, sum stóðu parkeraðir.

Maðurin, sum varð árendur, varð koyrdur á Landssjúkrahúsið, og hann hevur fingið onkrar skaðar men hevur tað eftir umstøðunum gott, verður upplýst.

Bilførarin koyrdi á fýra aðrar bilar, og onkur av teimum hevur fingið stóran skaða.

Løgreglan fer at tosa við eigararnar av bilunum í komandi viku, og eisini eru nógv vitni til óhappið, sum løgreglan fer at tosa við. Orsøkin til óhappið er enn ógreið, men hildið verður ikki, at førarin var ávirkaður.