Klaksvíkar kommuna: Øll tilboð á trivnaðarøkinum tøk frá hósdegnum

Seinastu vikurnar hava tilboðini á trivnaðarøkinum í Klaksvíkar kommunu verið avmarkaði orsakað av koronustøðuni, men kommunan boðar nú frá, at latið verður upp fyri øllum tilboðum í komandi viku.

– Í samráð við heilsufakligu ráðgevingina er støða tikin til, at latið verður upp fyri øllum tilboðum á trivnaðarøkinum frá hósdegnum 25. november, skrivar kommunan á heimasíðuna.

Frá hósdegnum í næstu viku hava bæði dagstovnar og kommunala dagrøktin, og spælistovan opið. Frítíðarskúlin Snjallabjalla, ið longu hevur havt opið fyri børnum í 1. flokki, verður frá hósdegnum eisini opin fyri børnum í 2. flokki. Húsið letur eisini upp 25. november.