Konsert við Tim Easton verður fríggjakvøldið

Fríggjakvøldið 12. november kl. 20.30, verður amerikanski sangskrivarin og sangarin, Tim Easton í Listastovuni. Tim Easton hevur fleiri enn 30 ár á baki ‘on the road’.

Tim kom til Føroya sunnudagin, og hevur seinastu dagarnar koyrt runt sum ferðamaður og upplivað landið. Fyrireikararnirhava valt ikki at avlýsa konsertina, men heldur at fylgja tilmælinum hjá landsstýrinum, og hava avmarkað hvussu nógv fólk kunnu koma til konsertina.

Mælt verður fólkum at hava koronupass ella eina negativa test, men tað er ikki sett sum eitt krav. Tó verður heitt á øll um at halda mest møguliga frástøðu og reinføri.

Tim Easton er føddur í New York State í 1966, men uppvøksturin var í Tokyo, Japan og Akron, Ohio. Sum ungur ferðaðist hann runt í Evropa í sjey ár sum gøtutónleikari, har hann búði í Paris, London, Madrid, Prag og Dublin. Uppvøksturin og hesi árini í Evropa hava skapað hansara spælistíl við blues, folk og country, og forteljandi tekstir um tað at ferðast.

Heimafturkomin, útgav hann sítt fyrstu album, og førdi hetta til at hann hitaði upp fyri millum onnur Grammy Award vinnarin Lucindu Williams og John Hiatt, sum eru vinfólk og mentorar hjá Tim.

Seinni flutti hann til Nashville har hann eisini útgav nógv, men fór at dyrka meira gamlar blues- og folk traditiónir bæði í sangskriving og innspælingum.

Í 2018 hátíðarhelt Tim 30 ár sum tónleikari og útgav albummið “Paco & the Melodic Polaroids”. Hetta er ein akustisk útgáva við bara Tim og Paco, gittarinum, sum hevur fylgt honum øll árini. Øll útgávan er innspæld beinleiðis á eina lakkplátu, eins og gjørt var í gomlum døgum, uttan møguleika fyri at redigera, og har koma tónlistarligu evnini hjá Tim veruliga til sín rætt.

Nýggjasta útgávan kom í 27. august 2021. Ein sterk og positiv útgáva sum boðar frá einum skifti í lívinum hjá Tim.