Koronustøðan í Danmark er støðug

Hvønn týsdag verður kontakttalið fyri farnu vikuna í Danmark kunngjørt. Heilsumálaráðharrin Magnus Heunicke leggur tað vanliga á Twitter við einari stuttari frágreiðing. Talið vísur, hvussu nógv ein smittaður persónur í miðal smittar onnum. Er talið undir eitt, so er farsóttin ikki í vøkstri, men tað er hon, um talið er omanfyri eitt. Tað var serliga meðan bretska B.1.1.7 frábrigdi gjørdi um seg á hávetri, at kontakttalið ofta  var høgt.

Talið fyri síðstu viku var 1,0. Hetta merkir, at ein smittaður í miðal smittar ein annan, og harvið at farsóttin  "stendur í stað". Tað boðar Heunicke frá í dag.

Heilsumálaráðharrin vísti til styrkina í mongu koppsetingunum og eggjar fólki til at "fáa sær prik skjótast gjørligt" 60,5 prosent av íbúgvunum í Danmark eru liðugt koppsettir.

85 fólk við koronu eru innløgd í Danmark. Smittutalið fyri farna samdøgrið er tað hægsta í tíggju dagar - 1.004. Tvey deyðsføll í samband við koronu eru srkásett, skrivar TV2.dk