Koronukanningar í Hoydølum allan veturin

Tað verður á gamla studentaskúlanum í Hoydølum, at fólk framyvir fara at verða kannað fyri koronu.

Hetta upplýsir Selma Herup, starvsfólkaleiðari á Landssjúkrahúsinum, fyri útvarpinum í kvøld.

Á Eystaru bryggu hevur borið til at verið kannaður meðan ein situr í bilinum, men hesin møguleikin verður ikki framyvir, tá kannað verður í Hoydølum.

Orsøkin er vánaliga veðrið í vetur, og í fleiri førum hevur tað ikki verið serliga tespiligt hjá potarunum at standa úti í fleiri tímar.

Potingarnar verða sostatt ikki longur órógvaðar av virkseminum á farstøðini, og opið verður tí heilt frá klokkan 17 seinnapartin og nakað út á kvøldið.