Koronupassið eigur at avtakast. Tað heldur Bjarni Kárason Petersen, tinglimur fyri Framsókn.
Hann skrivar í lesarabrævi, at koronupassið ikki hevur tænt sínum endamáli, og tíð er at staðfesta, at passið hevur dumpað.
- Eg haldi meg ikki vita betur enn fakmyndugleikin ger, men tá ið vit síggja, at smittutølini fara galoperandi uppeftir og at koronapassið ikki tykist at hjálpa uppá støðuna á nakran hátt, kann mann gera niðurstøðuna, at koronapassið hevur dumpað so dyggiliga.
- Endamálið við passinum var helst at tryggja, at mann ikki setti onnur í smittuvanda. Tað endamálið er ikki rokkið. Tí eigur koronapassið at avtakast, skrivar Bjarni Kárason Petersen.
Les eisini: Koronapass: Løgmaður bíðar eftir farsóttarnevndini
Tinglimurin heldur eisini at tíðin er komin at allir flokkar, ikki bara samgongan, seta seg saman at umrøða støðuna.
- Vit eiga at umrøða um ikki samfelagsligi, menniskjaligi og búskaparligi kostnaðurin av at lata samfelagið liggja niðurbundið, er vorðin munandi hægri, enn kostnaðurin av at hava ymiskir variantar av Covid-19 í umferð. Vit mugu hava eina Exit-strategi.
- Hetta hevur nú verið støðan í tvey ár. Tvey ár, sum eingi av okkum fáa aftur. Skulu vit eisini missa eitt triðja ár ella fýra kanska?
Vinarliga broyt tínar kennifíla - og privatlívsstillingar fyri at síggja hetta innihald