Koronutølini sveiggja: 45 tilburðir staðfestir í gjár

Seinastu vikuna hava koronutølini sveiggjað nógv. Sunnudagin vóru bara 27 tilburðir, men dagin eftir vóru heilir 51 tilburðir. Týsdagin vóru 28 tilburðir og í dag er talið uppi á 45 tilburðum.

Talið á aktivum tilburðum gerst altsamt lægri, og er nú komið niður á 407. Hetta er 29 færri enn í gjár.

Tí samstundis sum 45 nýggir tilburðir vórðu staðfestir í gjár, vóru eisini 74 staðfest frísk aftur eftir at hava havt smittuna.

Hægsta talið, vit hava havt síðani covid-19 byrjaði, var 3. november, tá 773 aktivir tilburðir vóru.

Sjey fólk eru innløgd á Sjúkrahúsverkinum við koronu og 359 eru í sóttarhaldi.