Sverri Egholm
Føroya fólk vendir nú aftur til ein vanligan gerandisdag, har korona ikki fyllir alt. Seinastu tilmælini eru tikin av frá í dag av, og tí verða koronutølini heldur ikki partur av fasta tíðindaflutninginum framyvir.
Vit hava í næstan tvey ár dagført koronutøl og gjørt grafar og annað upp á dagligu tølini, men hetta steðgar nú. Teigurin við tølunum, sum hevur ligið ovarliga á Portalinum, og sum allir føroyingar uttan iva hava sæð, er nú tikin burtur.
Fyrsti koronutilburðurin varð staðfestur 3. mars í 2020. Og nú vit hava 28. februar eru 34.237 tilburðir staðfestir í Føroyum. Tað er 53 prosent av føroyingum.
Flest tilburðir vórðu staðfestir av koronu tann 7. februar 2022 tá 1265 pcr-testir vístu positivt úrslit.
Tann dagurin tá flest pcr-kanningar vórðu gjørdar, var 17. januar 2022 tá 5208 fólk vórðu potað. Tilsamans eru 777.845 kanningar gjørdar.
Størsta tal á positivum samstundis er 4972 og tað var 4. februar 2022.
Vinarliga broyt tínar kennifíla - og privatlívsstillingar fyri at síggja hetta innihald