Koyrdu ov skjótt í Eysturoynni

Seinasta samdøgrið hevur løgreglan gjørt nógv burturúr at kanna ferðsluna, og í hesum sambandi vórðu fleiri bilførarar tiknir fyri at koyra ov skjótt, upplýsir vaktleiðarin á løgreglustøðini í Havn í morgun.

Í gjár var løgreglan úti og gjørdi ferðmátingar á Fuglafjarðarvegnum og Millum Fjarða, og har vórðu tilsamans tríggir bilførarar tiknir.

Á Fuglafjarðarvegnum varð ein tikin fyri at koyra 107 milometrar um tíman, hóast mest loyvda ferðin er 80, og tað gevur eitt klipp í koyrikortið.

Millum Fjarða vórðu tveir bilførarar, sum fingu treytaða frádøming av koyrikortinum fyri at koyra ávikavist 115 og 120 kilometrar um tíman.

Í nátt vórðu ferðmátingar gjørdar í Eysturoyartunlinum, og har fekk ein eisini treytaða frádøming fyri at koyra 125 kilometrar um tíman.

Seinnapartin í gjár varð ein bilur eisini steðgaður og kannaður í Eysturoynni, har tað vísti seg, at bilførarin hevði rúsevni og tilhoyrandi útgerð í bilinum, og tað verður hann skuldsettur fyri.

Seinnapartin í gjár varð ein bilførari í Havn eisini skuldsettur fyri ikki at halda víkiskylduna í sambandi við eitt ferðsluóhapp. Bert materiellur skaði stóðst av hesum.