Tveir bilførarar vórðu tiknir í ferðsluni í Havn í gjár og verða nú skuldsettir fyri rúsdrekkakoyring.
Hetta hendi um middagsleitið. Hald varð lagt á koyrikortið hjá øðrum bilføraranum, meðan hin sleppur at koyra meðan úrslitið av blóðroyndunum og víðari viðgerð av málunum fer fram.
93 og 95 km/t
Ferðsluløgreglan gjørdi eisini ferðakanningar í ferðsluni í Havn í gjár.
Á Glyvursvegnum, strekkinum frá Hamrinum og oman á Argjar, har løgreglan so at siga dagliga avdúkar bilar, ið koyra ov skjótt, vórðu tríggir bilførarar avdúkaðir fyri ikki at halda hámarksferðina.
Ein teirra koyrdi við 93 km/t, og fekk treytaða frádøming av førararættinum, meðan tveir bilførarar fingu klipp í koyrikortið.
Eisini á ringvegnum yviri við Strond varð koyrt við nógvari ferð í gjár. Ein bilur koyrdi við 95 km/t og bilførarin fekk eisini treytaða frádøming meðan ein annar fekk klipp í koyrikortið.
Bæði yviri við Strond og á Glyvursvegnum er hægst loyvda ferðin 50 km/t.
Vinarliga broyt tínar kennifíla - og privatlívsstillingar fyri at síggja hetta innihald