Kringlut leið á Krambatanga

Standferðslan boðaði fyrr í dag frá, at eingin sigling verður um Suðuroyarfjørð í morgin. Hetta tí, at veðurstovurnar lova so nógvan vind, at tað ikki er ráðiligt at sigla við avloysaraskipinum Prince á leiðini.

(Skíggjamynd: Marinetraffic)

Men longu í kvøld er fitt av vindi, og hetta gav eisini Prince trupulleikar, tá hann kom á Trongisvágsfjørð um hálvgun tólv tíðina. Eftir AIS-skipanini Marinetraffic at døma, snaraði skipið í ring á fjørðinum, áðrenn tað eydnaðist at skifta kós, og leggja at bryggju á Krambatanga.

Veðurstøðin hjá Landsverki sigur 14 m/s, og 20 m/s í hvirlunum á Krambatanga.

Nú, næstan ein tíma seinni fara bilarnir at koyra í land á Krambatanga. Síðani verður friður á Suðuroyarleiðini í eitt samdøgur ella so.