Landsstýrið hevur tikið lán á 1,1 milliard

2. juni í ár fellur eitt lánsbrævalán hjá Føroya Landsstýri, sum er 1,3 milliardir krónur, til gjaldingar. Føroya Landsstýri tók tí í gjár eitt lán á 1,1 mia. kr. við at selja lánsbrøv. Lánsbrøvini eru seld í Føroyum og í útlandinum.

3. juni verða 200 milliónir krónur goldnar av landskassans gjaldføri, og sostatt minkar landskassans skuld við 200 milliónum krónum. 

Nýggja lánið er eitt 2-ára standandi lán, sum fellur til gjaldingar 2. juni 2024. Áljóðandi rentan er 1,25%. Kursurin fyri lánið er 99,992% og effektiva rentan, sum bæði tekur hædd fyri áljóðandi rentuni og kursin, er tí 1,254%.

Seinast Føroya Landsstýri tók eitt tvey-ára lán var í 2020, og tá var áljóðandi rentan 0%. Rentustøðið er sostatt hækkað fitt síðani juni 2020, og rentan fyri nýggja 2-ára lánið er tí væl hægri (ella 1,25% hægri).

Landsbanki Føroya og Nordea Bank hava fyrireikað lántøkuna. Sølan av lánsbrøvunum gekk sera væl, og tá avtornaði vóru teknaðar munandi størri upphæddir, enn tær 1.100 mió.kr., ið tørvur var á.

Nú skuldin verður niðurgoldin við 200 mió. kr., verður nominella lánsbrævaskuld landskassans 3.743 mió. kr., sum er 18% av BTÚ í 2021.

Landskassin