Látrabjørg eru nú friðað

Í gjár var endaliga friðingin av Látrabjarg vestast í Vestfirðum í útnyðringspartinum av Íslandi staðfest.

Látrabjørgini eru 14 kilometrar til longdar. Tað hevur tikið drúgva tíð at fáa hesi bjørg, sum eru vestasta punkt í Evropa og í Íslandi, friðað, skrivar Morgunblaðið.

Talan er um eitt av mest týðandi fuglabjørgum í Evropa. Bergið er 441 metrar høgt, har tað er hægst. Bjørgini hava stóran týdning fyri íslendska lundastovnin, og eru eisini heimstað fyri helmingunum av øllum álkum í Íslandi, skrivar blaðið.

Tað hevur tikið tíggju ár at fáa friðingina upp á pláss við drúgvum samráðingum millum myndugleikar og jarðeigararnar.

Friðingin av bjørgunum hevur stóran týdning fyri møguleikan at skipa viðurskiftini á staðnum, vísir íslendski ráðharrin fyri umhvørvi og náttúrutilfeingi, Guðmundur Ingi Guðbrandsson á.

- Nú verður møguligt at skipa viðurskiftini her til gagns fyri allar partar. Bæði tey, sum liva her – fuglarnar – og tey, sum fegin vilja vitja her – ferðafólkini, sigur ráðharrin.

Fólk her í økinum hava røkt bjørgini síðan landnám, og friðingin letur upp fyri møguleikanum at síga eftir eggum í bjørgunum, eins og tey hava gjørt har í túsund ár, verður sagt.

Friðingin stýrir ikki bert gongdini uppi á landi, men eisini ferðsluni á sjónum, tí friðingin røkkur nakað út á sjógv, skrivar Morgunblaðið.