Leiðslan við Tjarnir: Tikin á bóli av móttøkuni

Farni leygarmorgun var ikki sum aðrir leygarmorgnar. Í øllum førum ikki fyri leiðsluna við Tjarnir – tí tá handaði Articon teimum alment lykilin til høllina.

Knøpp 8000 fólk tóku sær eina løtu úr kalendaranum og fóru biltúr niðan at síggja høllina.

- 8000 fólk! Tað kom okkum púrasta dátt við! Vit ovurfegnast um stóru undirtøkuna. Og alt gekk upp á stás! Vit sóu bæði børn og foreldur hugna sær á gólvinum allan dagin, sigur Regin W. Dalsgaard, stjóri.

Dagurin byrjaði við takkarorðum og brúsandi løgi, og síðan fekk leiðslan handað blómutyssi – og ikki minst lyklatyssi – til nýggju høllina.

- Í morgun trinu vit inn í nýggj kontór og harvið nýggjan kapittul. Enn eru tó onkrir snøklar eftir. Eitt nú er nýggja heimasíðan á gáttini, sigur Regin.

Gerandisdagurin byrjar tó longu at taka skap. Telefonirnar kima í heilum, og fólk úr øllum landinum senda fyrispurningar um at leiga høli til ymisk endamál so sum fund og føðingardag.

- Eg fari at nýta høvið til at takka øllum, sum gjørdu dagin serligan. Vit gleða okkum til komandi tíðina, sigur Regin at enda.

Sí eisini: Myndir: Opið hús við Tjarnir