Leyg fyri arbeiðsgevaranum: Fekk treytaða fongsulsrevsing

Í Danmark hevur ein 58 ára gomul kvinna úr Roskilde fingið 30 dagar treytaða fongsulsrevsing fyri at lúgva fyri arbeiðsgevara sínum, so hon kundi sleppa í feriu.

Sambært DR hevði kvinnan í nógv ár hildið feriu fyrstu vikuna í juli, men summarið 2017 fekk hon ikki frí ta vikuna. Tá tað ikki eydnaðist henni at fáa feriuætlanina broytta, leyg hon fyri arbeiðsgevaranum fyri at fáa frí kortini.

Hon segði við arbeiðsgevaran, at hon skuldi undir skurð og tí mátti sjúkrameldast í eina viku. Soleiðis eydnaðist tað henni at fara í feriu kortini, men tá hon kom heim aftur, fekk tað avleiðingar.

Hon varð nevniliga skuldsett fyri svik, og í rættinum í Roskilde játtaði hon seg seka í ákærunum.