Líkið av Navalnyj latið mammu hansara

Líkið av russiska andstøðinginum Aleksej Navalnyj er latið mammu hansara, Ljudmila Ivanova, upplýsir talsfólk hjá Navalnyj.

Tað var fríggjadagin 16. februar, at russisku myndugleikarnir boðaðu frá, at Navalnyj var deyður í einari fangalegu í norðasta parti av Russlandi.

Familia og starvsfólk hansara fingu síðani at vita, at lík hansara varð flutt til eitt líkhús í býnum Salekhard, ið liggur nærindis. Men familjan slapp hvørki at síggja líkið ella at fáa tað útflýggjað.

Mamma Navalnyj er framvegis í Salekhard, og enn er ógreitt hvussu og nær hann skal jarðast.

Sambært fleiri miðlum fekk mamma Navalnyj eitt ultimatum viðvíkjandi jarðarferðini. Hann kann annaðhvørt verða jarðaður í fangaleguni ella familjan kann jarða hann í stillum.