List úr tini í gamla seglhúsinum

Hósdagin 17. desember letur ein serlig framsýning upp í Gamla Seglhúsinum í Klaksvík. Sýnd verða listaverk hjá listahandverkaranum Helga Joensen, sum er  víða gitin fyri sítt sermerkta tinsmíð.

Gjøgnum árini hevur Helgi leitað fram ymsar møguleikar og gjørt alskyns royndir við hesum serstaka metali, fingið tinið at tala og gandað fram tær vakrastu vondir í alskyns íløtum, skálum, stakum og øðrum brúkslutum, relieffum og skulpturum – stundum samansettum av fleiri staklutum.

Helgi hevur sýnt list sína fram í týðandi listaskálum víða hvar um lond.

Helgi Joensen er føddur í 1932. Hann er sonur Óla Joensen úr Klaksvík og Oliviu Joensen úr Miðvági. Helgi hevur eina systur, Dagmar, sum er gift og býr í Norra.

Óli og Olivia bygdu sær hús á Ziskatrøð. Tey ovastu húsini á Prestvegi.Óli var skiparalærdur og førdi Fossanes, sum fórst undir Íslandi í 1938. Olivia var fotografur og hevði atelier við hús.

Eftir at hava mist mannin flutti Olivia við børnunum til foreldur síni, sum tá stóðu fyri sjómansheiminum í Havn.

Hon arbeiddi sum fotografur í Gamla Bókhandli og hjápti til á sjómansheiminum. Soleiðis kom Helgi at búgva í Havn mestu tíðina undir krígnum.

Mamman giftist uppaftur við einum norskum sjómanni, Julius,og tey fluttu øll til Norra eftir kríggið. Helgi er útbúgvin verkfrøðingur og arbeiddi fyrstu árini hjá Stavangerflint, sum ger steintoy. Mitt í 70unum gjørdi hann saman við einum øðrum jólaplattar úr tini.

Í 80unum byrjaði hann fyri seg sjálvan, og hevur gjøgnum árini havt framsýningar í fleiri stórbýum í Evropa og USA. Helgi hevði í mong ár verkstað og antikvitetshandil í Stavanger. Nú hevur hann verkstað Brønderslev í Norðjútlandi.

Framsýningin í Gamla Seglhúsinum letur upp hóskvøldið kl. 18, tá Magna Joensen fer at halda eina røðu. Verkini hjá Helga Joensen verða at síggja fram til hálvan januar 2021.