Løgmaður á toppfundi í Reykjavík

Í dag og í morgin verður toppfundur í Evropeiska ráðnum hildin í Reykjavík. Aksel V. Johannesen, løgmaður, luttekur á fundinum.

Ovast á dagsskránni er russiska innrásin í Ukraina. Saman við stjórnarleiðararum úr øllum Evropa fer løgmaður at taka lut í ymiskum orðaskiftum í Reykjavík, skrivar løgmansskrivstovan..

- Tað hevur stóran týdning fyri okkum at vera virkin á øllum pallum, har trygdarpolitiska kósin komandi árini verður stungin út í kortið. Eg gleði meg at taka lut og skifta orð við aðrar stjórnarleiðarar um fleiri viðkomandi mál, sigur Aksel V. Johannesen, løgmaður.

Aksel V. Johannesen (Sanvsmynd: Sverri Egholm)

Miðvísur føroyskur trygdar- og verjupolitikkur

Løgmaður heldur, at tørvurin á einum miðvísum føroyskum trygdar- og verjupolitikki er stórur. Hann væntar eisini, at júst trygdar- og verjumál fara at standa ovarlaga í politiska orðaskiftinum í Føroyum frameftir.

- Longu áðrenn russisku innrásina í Ukraina var trygdarpolitikkur aftur eitt evni, sum setti sín dám á politiska orðaskiftið í Føroyum, og hetta hevur bara tikið dik á seg seinasta árið. Eg vænti, at trygdarpolitikkur fer at fylla nógv í føroyskum politikki komandi árini, vísir løgmaður á.

Bara fjórðu ferð

Hetta er bara fjórðu ferð í 74 ára gomlu søguni hjá Evropeiska ráðnum, at stjórnarleiðararnir í limalondunum hittast.

Á fundinum í Reykjavík verða í alt 900 útlendsk umboð fyri tær ymisku stjórnirnar og millum 300 til 500 miðlafólk.