Løgmaður bar seg undan at hitta Zelenskyj

Ukrainski forsetin, Volodymir Zelenskyj, er í dag komin á vitjan í Danmark. Um middagsleitið í morgin skal hann halda røðu í Fólkatinginum.

Talan er um eina søguliga hending, tí hetta verður fyrsta ferðin, at ein útlendskur leiðari sleppur at halda røðu í sjálvum fólkatingssalinum.

Á vitjanini á Fólkatingi skal Zelenskyj hitta umboð fyri formansskapin á fólkatingi, floksleiðararar og umboð fyri Grønland og Føroyar, gongur fram í fráboðan frá fólkatinginum.

Beinir Johannesen, løgmaður, upplýsir, at hann var boðin at vera við til móttøkuna, men at hann hevur borið seg undan orsaka av nógvum politiskum uppgávum í hesum tíðum, eitt nú í løgtinginum.

Sum Portalurin skilir, verða Johan Dahl, løgtingsformaður, Jonhard Klettheyggj, løgtingsstjóri, til staðar á móttøkuni í morgin.